1935-жылы 30-декабрда жаштар рапортун тапшыруу үчүн кыргыз жаштары Фрунзеден Москвага чейин лыжа менен барышкан. Жүрүш кечки саат 18:00дө старт алып, 60 күндө жетип баруу мерчемделген. Бул тууралуу Жоомарт Бейшеналиев Sputnik Кыргызстан радиосунун эфиринде маек куруп жатып билдирди.
Анын айтымында, бул окуя тууралуу кыргыз коомчулугу унутуп калды.
"1936-жылы БСЛКЖСтин (Бүткүл Союздук Лениндик Комунисттик Жаштар Союзу) 10-съезди март айында Москвада өтмөк. Ага кыргыз делегациясы өзгөчө даярданып, жаштар рапортун лыжа менен 60 күндө жеткирүүнү туура көрүшкөн. 1935-жылдын 30-декабрында алты адамдан турган топ Ала-Тоо аянтынан сапарга чыгып, аларды узатууга Баялы Исакеев баштаган өлкөнүн расмий өкүлдөрүнүн жоон тобу катышкан. Алардын маршруту Мерке, Луговое, Кызыл-Ордо, Куйбышевден өтүп, 54 күн ичинде Москвага жетип, жаштар рапортун өз мөөнөтүнөн мурда тапшырууга үлгүрүшкөн. Тилекке каршы, алардын мындай эрдигин азыркы Жаштар иши, дене тарбия жана спорт агенттиги деле биле бербесе керек", — деди Бейшеналиев.
Ошондой эле ал лыжа жүрүшүнө катышкан алты жаран төрт ай Фрунзе — Рыбаче, Фрунзе — Мерке — Луговое аралыгында атайын машыгуудан өткөндүгүн кошумчалады.
