БИШКЕК, 29-окт. — Sputnik. Бишкектеги түнкү клубдардын биринде чыккан мушташтан улам каза тапкан бала биринчи курстун студенти болгон. Бул тууралуу Бишкек ШИИБден маалымдашты.
Эскерте кетсек, 28-октябрга караган түнү эс алып жүргөн үч баланын ортосунда пикир келишпестик чыккан. Экөө биригип, үчүнчүсүн ур-токмокко алышкан. Соккудан улам ал жыгылып башы менен тепкичке тийген. Жабырлануучу алган жаракатынан улам ошол жерден жан берген.
"Түнкү клубда мушташ чыкканы боюнча маалымат милицияга 28-октябрь күнү түнкү саат 1.30дар чамасында түшкөн. Окуя болгон жерге Октябрь райондук ички иштер башкармалыгынын кызматкерлери барып, тепкичтин жанында жаткан баланын сөөгүн табышкан", — деп укук коргоо органдарынан билдиришти.
Кийин балдар биринчи курска кабыл алынгандарын майрамдап жатып уруша кеткени белгилүү болгон.
Шектүүлөр убактылуу кармоочу жайга киргизилип, Кылмыш жаза кодексинин 104-беренеси (ден соолукка атайылап залака тийгизүү) боюнча кылмыш иши козголду. Тергөө амалдары уланууда.
