Үңкүр да болсо үйү бар. Жалал-Абад облусунун Арсланбобуна бара жатканда жолоочулар тоо алдында курулган үйдү көрүшү мүмкүн. Ал жакта 68 жаштагы Төлөн Мамырасулов үй-бүлөсү менен күн кечирет. Үңкүр үйүнөн жубайы экөө беш бала чоңойтуптур. Кызыктуу каармандын жашоосун видеодон көрсөңүздөр болот.
Үйгө жетпегендер. Бишкекте болсо үй алам деп алданып калгандар Ак үйдүн алдына митинге чыгышты. Акчасын берип, бирок баш калкалар жерине жетпей бир үлүшчү каза болсо, үчөө инсульт алып жатып калышкан. Алардын арманын уккан бир жан жоктой.
Ал эми саясаттын сазына кирип алгандар карапайым элдин жашоосун ойлогонго убактысы жоктой. Эл да оозунан саясатты түшүрбөйт, соцтармакта талкуулагандары деле саясат. Кечээ Facebook,Twitter баракчаларында мурдагы президент Атамбаевдин учактагы сүрөтү, Нариман Түлеев менен селфиси кызуу талкууланды.
Президент Сооронбай Жээнбеков болсо жаңы дайындалган тышкы иштер министри Чыңгыз Айдарбековду кабыл алып, тапшырма берди.
Элчилер. Дипломат демекчи Sputnik агенттиги кыргыз элчилери мурда кайсы тармакта иштегенине кызыгып көрдү.
Чубактын кунундай чубалган реконструкция. Мамлекеттик тарых музейи али күнгө чейин ачыла элек. 2016-жылдын март айында реконструкцияланып баштаган бул жайдын эмне себептен азыркы күнгө чейин ишке берилбей жаткан себебин кабарчылар билип көрдү.
Валюта наркы. Сомдун баасы долларга карата орто эсеп менен 69.35 (сатып алуу) жана 69.48 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 46.50 сом, АИ-92 үлгүсүндөгү май 44.00 сом, ал эми дизель майы 46.50 сомдон сатылууда.
Соңку сөз. Жакшылыктын эрте-кечи жок!
Ден соолук тилеп, Таалайгүл Усенбаева.
