Айыл-чарба продукцияларын өндүрүүдө экспорттолчу жер-жемиштерге насыя алуу жеңилирээк. Бул тууралуу Гүлзамира Туратбек кызы Sputnik Кыргызстан радиосунун эфиринде маек куруп жатып белгиледи.
Анын айтымында, айыл-чарбасына багытталган насыялар 12 айдан 30 айга чейинки аралыкка берилет.
"Республиканын коммерциялык банктары айыл-чарба багытындагы насыяларды орто эсеп менен жылына 15тен 32 пайызга чейинки үстөк пайыз менен сунуш кылат. Төлөөнү жеңилдетүү үчүн өзгөчө ийкемдүү төлөм графиги каралган. Бул сезондук бизнестер үчүн ыңгайлуу. Төлөө мөөнөтү бир жылдан 2,5 жылга чейинки аралыкты түзөт. Насыя алуу үчүн фермердин паспорту, кепил болчу адамдын жана күрөө берүүчүнүн паспорту, ошондой эле кепилдик берген адам менен фермердин кирешелерин ырастоочу документтер, буларга мал-жандыктары тууралуу, жердин ижарасы, жеке ишкерлиги тууралуу күбөлүгү жана патент кирет. Мындан сырткары, күрөөгө коюлуп жаткан мүлктүн да тиешелүү документтери талап кылынат. Дыйканчылык кылууга насыя берүүдө күңөсканаларды иштетүү менен багбанчылыкка артыкчылык берилет", — деди Туратбек кызы.
Ал дыйкандар күрөөсүнүн суммасы алчу насыясына жетпей калган учурда кепилдик фонддоруна кайрылса болоорун кошумчалады.
