БИШКЕК, 19-окт. — Sputnik. Кыргызстандагы жергиликтүү авиакомпаниялардын учактарынын 90 пайызы эскиргенин КР транспорт прокуратурасынын өкүлү Рустам Кожобеков Sputnik Кыргызстан агенттигинин маалымат борборунда өткөн тегерек столдо билдирди.
Анын айтымында, Кыргызстандагы авиакомпаниялардын көпчүлүгүнүн учактары 25 жылдан бери учкандыктан, тез-тезден бузулат. Өлкөдө ушу тапта бузулган 12 учак бар.
"Авиакоопсуздук боюнча жыйында булар айтылды. Авиакомпанияларга авиапаркты жаңылоо сунуштары берилди", — деди Кожобеков.
Ал ошондой эле техниканын иштен чыгышы авиакырсыктардын орун алышынын негизги себеби экенин кошумчалады. 2017-жылы 12 болсо, жыл башынан бери 11 учур катталган.
Тегерек столдо Кыргызстанда 22 авиакомпания катталганы, бирок алардын ичинен "Авиа Траффик Компани", "Tez Jet" жана "Эйр Манас" гана иштей турганы айтылды.
