БИШКЕК, 4-окт. — Sputnik. Бүгүн парламенттин жалпы жыйынында өкмөттүн аппарат жетекчиси-министри Шамилбек Асымбеков, юстиция министри Марат Жаманкулов жана Өнөр жай, энергетика, жер казынасын пайдалануу мамлекеттик комитетинин төрагасы Эмил Осмонбетов ант берди.
Антты президент Сооронбай Жээнбеков кабыл алып, жалпы депутаттарга жана аткаруу бийлигине жаңы келгендерге кайрылып, берген антын унутпай, дайыма эл үчүн кызмат кылышы керектигин айтты.
"Урматтуу депутаттар, жаңы өкмөт мүчөлөрүнүн антын кабыл алдык. Ушул жерде отургандар элдин өзгөчө көзөмөлүндө, элдин сыноосунда ар дайым турган адамдарбыз. Ар бир жасаган ишибиз элдин элегинен, сыноосунан өтөт. Айрыкча коомдо акыркы учурда аткаруу кызматында иштеп жүргөн кээ бир адамдардын жүрүм-туруму, кылган иши боюнча катуу сындар айтылып жатат, талкуулар болуп жатат. Андай болбош керек. Ушул жерде отургандардын жүрүм-турумун көрүп туруп үч бийликтин бутагына ою калыптанат. Ар бирибиздин жасаган кадамыбыз менен элдин бийликке болгон ишеними келет. Берген антты терең түшүнүп, жоопкерчилигин түшүнүп, аны катуу кармагыла. Антты бузгандардын тагдыры кандай болгонун жана эмне болуп жатканын жакшы билесиңер. Эзелтен бери кыргыз эли антты ыйык кармап, анын маңызын, жоопкерчилигин терең түшүнүп келген", — деди Жээнбеков.
Өлкө башчысы өкмөттүн жаңы мүчөлөрүн берген антты унутпай, мамлекет үчүн ак иштеп берүүгө чакырды.
