БИШКЕК, 26-сен. — Sputnik. Кыргызстандык мушкер Валентина Шевченко UFC уюмунун эң жеңил салмактагы (57 кг) чемпиондук наамы үчүн польшалык Йоанна Еджейчик менен кармашат. Бул туурасында аталган уюмдун расмий сайтында айтылат.
Беттеш 8-декабрда Торонто (Канада) шаарында UFC 231 турниринин алкагында өтөт.
OFFICIAL! @JoannaMMA meets @BulletValentina for the flyweight strap at #UFC231 in Toronto Dec. 8! pic.twitter.com/wZ6geXV6OL
— UFC (@ufc) 21 сентября 2018 г.
Йоанна Еджейчик UFC уюмунун өтө жеңил салмактагы (52 кг) мурдагы чемпиону. Былтыр Роуз Намаюнастан утулуп, наамынан ажыраган. Эми ал жаңы салмакта күчүн сынаганы турат.
Ошондой эле Еджейчик да, Шевченко да тайбокс боюнча дүйнөнүн бир нече жолку чемпиону болуп саналат.
Шевченко чемпиондук кур үчүн америкалык Никко Монтано менен 8-сентябрда Даллас шаарында UFC 228 турниринин алкагында беттеш өткөрүшү керек болчу. Бирок Монтано кармашка бир күн калганда ден соолугуна байланыштуу ооруканага түшкөн. Валентина болсо атаандашы атайын беттештен качып жатат деп айтып чыккан. Көп өтпөй UFC башчысы Монтанону наамынан ажытатып, кыргызстандык мушкерге жыл аягына чейин чемпиондук мелдеш өткөрүп берүүнү убадалаган.
