БИШКЕК, 29-авг. — Sputnik. Кыргызстандын тышкы иштер министрлиги ЖККУнун Канттагы аскер базасынын жоокери баласы менен бараткан аялды жолдон коюп кетиши боюнча орус тарапка нота жиберди. Бул тууралуу ТИМдин маалымат кызматы кабарлады.
27-августта Лебединовка айылынан ЖККУнун авиабазасынын жоокери жол кырсыгына кабылып, эне-баланы коюп кеткен. Аял ооруканага баратканда үзүлсө, кичинекей бала ооруканада.
ТИМге Россиянын элчисинин милдетин убактылуу аткарып жаткан Вадим Чексазов менен базанын жетекчиси Андрей Янкин чакырылган. Тышкы иштер министрлиги орус тарапты тергөөнүн бардык жүрүшүнө катышуусу керектигин жана жабыркагандарга жөлөк пул төлөөсү зарылдыгын билдирген.
Өз кезегинде орус тарап каза болгон жарандын үй-бүлөсүнө жөлөк пул төлөп, тергөөнүн жүрүшүнө катышууга даярдыгын маалымдады. Алардын айтымында, жол кырсыгынын күнөөкөрү авиабазанын аймагында камакта турат.
