БИШКЕК, 4-авг. — Sputnik. Өспүрүмдөрдүн арасындагы кылмыштуулукту азайтуу үчүн аларга жеке өнүгүү шарттарын түзүп берүү керек. Бул тууралуу вице-премьер Алтынай Өмүрбекова ведомстволор аралык координациялык кеңештин жыйынында айтты.
Өмүрбекованын айтымында, балдардын арасындагы кылмыштуулукка өлкөдөгү социалдык-экономикалык абал жана адеп-ахлактык факторлор да таасир этүүдө.
"Миграциянын өсүшүнөн улам жашы жете элек балдар туугандарынын камкордугунда калып жатат. Алардын көбү улгайган же иштеген кишилер болгондуктан балдарга тийиштүү көзөмөл кылынбай калууда. Биз турмуш шарты оор өспүрүмдөргө психологиялык жардам көрсөтүү үчүн күндүзгү борборлорду түзүп, алардын үй-бүлөлөрүн колдоо программаларын иштеп чыгуубуз керек. Спорт, музыка жана бий менен алектенүүгө шарттарды түзүү менен аларды көчөдөн тартуу зарыл. Балдар бош убактысын жеке өнүгүүсү үчүн пайдалуу өткөрүүлөрү кажет", — деди вице-премьер.
Укук коргоо органдары белгилегендей, балдар арасындагы кылмыштуулукка ата-энелердин ажырашып, үй-бүлөлүк деградациянын күч алуусу да таасир берип жатат.
Жыйын соңунда вице-премьер балдарга ата-энелердин көзөмөлүн күчөтүп, аларга турмуштук баалуулуктарды калыптандыруу үчүн ыктыярчылык кыймылдарына тартуу, түшүндүрүү иштерин жүргүзүү сыяктуу бир катар тапшырмаларды берди.
