БИШКЕК, 26-июл. — Sputnik. Жыл сайын өтүп келген салттуу маданият жана кол өнөрчүлүк боюнча эл аралык XIII "Оймо" фестивалы старт алды.
2006-жылдан бери жыл сайын июль айынын акыркы жумасында өткөрүлүүчү Эл аралык "Оймо" фестивалы Бишкек шаарынан башталып, Ысык-Көлдүн жээгинде уланып келет.
Быйыл Борбордук Азия өлкөлөрүнөн, Россиядан, Индиядан жана Афганистандан меймандар келди. Кыргызстандын жана чет өлкөлөрдүн 150дөн ашуун кол өнөрчүлөрү буюм-тайымдарын алып чыккан.
Түштөн кийин "Кийиз дүйнө" коомдук фондусу тарабынан аялдардын салттуу баш кийимдери боюнча "Элечек" флэш-мобу өттү. Анын алкагында бир саатта 100 аялга элечек оролду.
Кечке жуук "Оймо" фестивалынын расмий ачылышы болуп, концерттик программа менен коштолду. Иш-чара "Ала-Тоо" аянтындагы Курманжан датканын эстелигинин алдында 29-июлга чейин уланат.
Бул күндөрү балдар жана чоңдор үчүн мастер-класстар өтөт. Көчмөндөрдүн дүйнөлүк III оюндарына карата студенттердин, кол өнөрчүлөрдүн жана жаш дизайнерлердин арасында "Этно-Мода" тандоо сынагы болот. "Куурчакчылар гильдиясы" Эмен багында автордук куурчактардын көргөзмөсүн уюштурат.
Фестивалдын максаты – Кыргызстандагы кол өнөрчүлүктү өнүктүрүү, каада-салттардын муундан муунга өтүүсүн жандандыруу, маданий мурастарды сактап калуу. Андан сырткары Ысык-Көлдөгү маданий туризмдин эл аралык аймагына айландыруу.
