Телевидениеден жаңылыктарды кайгылуу окуяны кубануу менен окуп, элге жеткирген адамгерчиликке жатпайт. Бул тууралуу Айнура Кабатай кызы Sputnik Кыргызстан радиосунун эфиринде маек куруп жатып билдирди.
Анын айтымында, дикторлук – бул абдан жоопкерчиликтүү кесип.
"Бул жерде эң алгач туура дем алып, үндү тарбиялоо талап кылынат. Тилекке каршы, кыргыз элине белгилүү бир чыгармачыл инсан каза болгондо ал жаңылыкты жаркылдап окуган дикторду көргөм. Мындай учурда телекөрүүчүдө бул нерсеге диктор гана эмес, ошол телеканал да ал кишинин көзү өткөнүнө кайдыгер мамиледе экен деген пикир калат. Адам жашоодо кайгырганда жүзүнөн жылмаюу кетип, үнү басаңдап, жай темп менен сүйлөй баштайт. Экранда да жашоо мыйзамдары боюнча интонацияны колдонуу абзел", — деди Кабатай кызы.
Диктор жумушуна өтө кылдаттык менен мамиле жасоо керектигин кошумчалады.
