Соңку алты айдын жыйынтыгы менен Кыргызстанда кызамык менен ооруган 335 учур катталды. Бул тууралуу Гүлбара Ишенапысова Sputnik Кыргызстан радиосунун таңкы эфиринде маек куруп жатып билдирди.
Анын айтымында, аталган ооруну алдын алуу үчүн сөзсүз түрдө адам эмдөөдөн өтүш керек.
"Кызамык оорусу – вирустук инфекция. Эгер 1-кабаттагы бала аталган илдетке чалдыкса, аба аркылуу 9-кабатта жашаган балага да жугушу мүмкүн. Оору жуккандан кийин жети күн ичинде байкалат. Анын алгачкы белгилери – температура болуу, жөтөлүү жана көздөн жаш чыгуу. Мындай илдет менен өткөн жылы беш учур (экөө балдар) катталса, 2018-жылдын алты айында эле 335 учур (145и балдар) катталып, кызамык менен ооругандардын саны кескин өстү", — деди Ишенапысова.
Адис жаш балдарга бир жашында, ал эми чоңоюп калганда, алты жашында эмдөө жүргүзүлүшү шарт экенин кошумчалады.
