Кыргызстанда мыкты ашпозчулар жокко эсе. Учурда чыгыш тамактары эл арасында кеңири тарагандыктан, ресторан, чоң-чоң чайканалар шкана адистерин Өзбекстандан,Тажикстандан алып келишет. Бул тууралуу Аскар Дүйшөнбеков Sputnik Кыргызстан радиосунун эфиринде маек куруп жатып билдирди.
Анын айтымында, аталган кесипке окуткан окуу жайлардын студенттери тажрыйба топтоого келгенде шыгы болсо, ошол жерде иштеп калуу мүмкүнчүлүгү чоң.
"Бизде ашпозчулук шыгы болсо, андан ары өз алдынча үйрөнгөндөр арбын. Алар көбүнчө кафе, ашканаларда иштешет жана бул кесипке окуп, тажрыйба топтоого келген студенттердин аракетчилин алып калганга жан үрөшөт. Анткени, өлкөдө бул багытта мыкты адистер жокко эсе. Ошондуктан да ресторан, тойканалар башка жактардан ашпозчу алып келгенге аргасыз болушат. Кошуна өлкөлөрдө бул тармак бир топ жолго коюлуп калган. Мисалы, ашпозчулардын ар кандай уюм, бирикмелери бар. Алар адистерин түрдүү окуу, тажрыйба алмашууларга жөнөтүп турушат", — деди Дүйшөнбеков.
Ал бардык тоскоолдуктарга карабай, ресторан бизнеси өлкөдө тез өнүгүп келе жатканын кошумчалады.
