БИШКЕК, 13-июл. — Sputnik. Бишкек шаардык кеңешинин депутаттары калаа башчысы Албек Ибраимовго ишеним көрсөткөн жок. Добуш берүү жашыруун түрдө болуп, 40 депутат катышып, алардын бардыгы тең макул деп добуш беришти.
Белгилей кетсек, 13-июлда Бишкек шаардык кеңештин депутаттары "калаада түзүлгөн кырдаал боюнча" кезексиз жыйынга чогулган.
Май айынын ортосунда Бишкекте 50гө жакын киши чогулуп, Албек Ибраимовдун отставкасын талап кылган. Андан сырткары шаардык кеңештеги "Республика — Ата-Журт" фракциясы да мэрдин кызматтан кетиши керектигин айтып чыгышкан.
Андан сырткары УКМК Албек Ибраимов "Дастан" ишканасынын башкармалыгынын төрагасы болуп турганда ири өлчөмдө каражат уурдалгандыгы аныкталды деп кылмыш ишин козгогон. Өз кезегинде Ибраимов ага карата кылмыш ишинин козголушунда саясий боёктор бар экенин айткан.
