БИШКЕК, 7-июл. — Sputnik. Бишкекте аймактык милиционерлер жарым жылда жолду туура эмес жерден кесип өткөн 800дөн ашык жөө кишиге айып салган. Бул тууралуу шаардык милициянын маалымат кызматынан кабарлашты.
Ага ылайык, милиция кызматкерлери шаар тургундары арасында такай түшүндүрүү иштерин жүргүзүп келет.
"Шаар милициясы анын ичинде райондук, аймактык инспекторлор тарабынан "Жөө адам" деген түшүндүрүү иштери такай аткарылып келет. Милиционерлер жолду туура эмес жерден кесип өткөн кишилерди аныктап, администрациялык протокол түзүшөт", — деп айтылат маалыматта.
Мындай мыйзамды бузгандарга 500 сом айып салынат.
Андан сырткары, шаардык милиция жолду туура эмес жерден кесип өткөндөргө аймактык милиция айып сала ала турганын түшүндүргөн социалдык ролик тартышкан.
