БИШКЕК, 5-июн. — Sputnik. Бишкекте жер тилкеси мыйзамсыз негизде убактылуу колдонууга берилип кеткендиги боюнча кылмыш иши козголгонун Башкы прокуратурадан билдиришти.
Маалыматка караганда 2017-жылдын 20-июлунда "Бишкекбашкыархитектура" муниципалдык ишканасынын кызматкерлери мыйзамсыз негизде "Р.Т." ЖЧКсына 0,31 гектар жерди берүү боюнча сунушун комиссиянын кароосуна жиберген. Бирок аталган жер кызыл линияда экени корутундуда атайылап көрсөтүлгөн эмес.
"2017-жылдын 21-июлунда комиссия ЖЧКга жерди убактылуу бөлүп берүүгө уруксат берген. Аталган чечимдин арты менен жер беш жылга ижарага берилип кеткен. Кийин "Р.Т." ЖЧКсы жер тилкени "П.А." атуу ЖЧКга 3,4 миллион сомго сатып жиберген", — деп айтылат маалыматта.
Факты боюнча Кылмыш жаза кодексинин 304 (кызматтык абалын кыянаттык менен пайдалануу) жана 166-беренеси (алдамчылык) боюнча кылмыш иши козголду.
