БИШКЕК, 9-май — Sputnik. Улуттук Эне жана баланы коргоо борборунда 45 жаштагы келин үч эм төрөдү. Бул тууралуу Sputnik Кыргызстан маалымат агенттигине борбордун жетекчиси Камчыбек Узакбаев билдирди.
Анын айтымында, ымыркайлар жарык дүйнөгө 4-май күнү эле келген, бирок балдардын абалы жакшырганча дарыгерлер эч кимге маалымат берген эмес.
"45 жаштагы аял бизге Чүй облусунун Жайыл районунун Жон-Арык айылынан келген. Улуу кызы 24 жашта экен. Андан кийин балалуу боло албай жүрүп жасалма уруктандыруу жолу менен үч эм төрөдү. Ымыркайлардын экөө кыз, бирөө эркек. Кыздары 2,160, 2,380 килограмм салмакта. Ал эми уулу 2,500 кг болуп төрөлдү. Кыздардын абалы жакшы, баласы болсо интенсивдик терапия алып жатат", — деди Узакбаев.
Балдар борборунун жетекчиси эненин абалы учурда жакшы экенин айтып, бирок азырынча ооруканадан чыгарылбай турганын кошумчалады.
