БИШКЕК, 8-май. — Sputnik. Сириянын чыгыш аймактарынын үстүнөн учуп жүргөн маалда Россиянын Ка-52 тик учагы ("Аллигатор") кулаганын РИА Новости РФтин Коргоо министрлигине таянуу менен жазып чыкты.
Кырсыктан каза болгон эки учкучтун сөөгү база жайгашкан аэродромго алып келинген.
"Алдын ала маалымат боюнча тик учактын кулашына техникалык мүчүлүштүк себеп болушу мүмкүн", — дешкен министрликтен.
Бул россиялык аскерлердин Сириядан көз жумган биринчи учуру эмес. 3-май күнү Су-30СМ учагы Хмеймим аэродромунан учуп чыккандан кийин кырсыктап, андагы эки учкуч набыт болгон. Коргоо министрлигинин маалыматында каргашага учактын кыймылдаткычына кирип кеткен чымчык негиз болгону айтылган.
