БИШКЕК, 2-май. — Sputnik. Социалдык тармак менен мессенджерлерде өздөрүн Кыргызстанда тыюу салынган "Ислам мамлекети" (ИМ) террордук тобунун өкүлдөрү деп атаган белгисиз адамдар Бишкекте теракт уюштурабыз деп, шаар бийлигине ультиматум койгон видео жайылууда.
Улуттук коопсуздук боюнча мамелкеттик комитеттин расмий өкүлү Рахат Сулайманов комитет аталган видеону иликтеп, ага тийиштиги бар адамдарды тактап жатканын кабарлады. Анын айтымында, аты аталган аялдын чоо-жайы да иликтенүүдө.
Sputnik Кыргызстан агенттиги аял борбор калаадагы ЖОЖдордун биринде иштей турганын аныктап чыкты. Кабарчынын аны менен байланышуу аракетинен майнап чыкпады. Окуу жайдан аялдын чет өлкөдө командировкада экенин, Бишкекке бир айдан кийин келерин айтышты.
Буга чейин Борбор Азиядагы Америка университетинин аймагына, "Бишкек парк" соода борборуна да бомба коюлганы тууралуу маалымат тараган.
