БИШКЕК, 26-апр. — Sputnik. Улуттук коопсуздук мамлекеттик кызматы мекеме жайгашкан дарек боюнча Тез жардам кызматынын унаасы эмнеге келгенине түшүндүрмө берди.
Ага ылайык, Тез жардам кызматы УКМКнын имаратына күн сайын процедуралык иштер менен келет. Анткени УКМКнын тергөө абагында отурган жарандар бар. Андыктан бүгүн келген Тез жардам унаасынын Сапар Исаковго эч кандай тиешеси жок.
Исаков "Бишкек ТЭЦтин модернизациялоо" долбоорунун алкагында козголгон кылмыш иши боюнча күбө катары чакырылып, саат 15.00дө УКМКнын имаратына кирип кеткен болчу.
Эске салсак, үстүбүздөгү жылдын 26-январында ТЭЦте авария болуп, анын кесепети беш күндөн кийин жоюлган. Бул боюнча кылмыш иши козголуп, анын алкагында тийиштүү мекеме жетекчилери камакка алынган.
19-апрелде Жогорку Кеңеш өкмөттүн 2017-жылы жасаган ишин канааттандырарлык эмес деп таап, Исаков башында турган министрлер кабинетин отставкага кетирген.
