Ошол жылдары алардын чыгармачылыгы оргуштап, көптөгөн сыйлыктарды багындырган кези болгон.
Айтматов менен чогуу жүрүп, ал кишинин акыл-наасатын угуп калган академик Абдылдажан Акматалиев залкарлардын мамилеси тууралуу төмөнкүчө айтып берди.
"Алардын мамилеси 1950-жылдары башталган. Анткени ошол жылдары Түгөлбай Сыдыкбековдун "Тоо арасында" романынын экинчи китебин Кайсын Кулиев менен Чыңгыз Айтматов орус тилине которгон. Ошондон тарта алака түзүлүп, Айтматов юбиляр Сыдыкбековдун 60 жылдыгына карата "Тоо бөксөрбөйт" деген чоң макаласын жарыялайт. Кийин 80 жылдыгында да чет өлкөдө жүргөндүгүнө карабай, мага телефон чалып, куттуктоосун жаздырган. Аны мен Опера жана балет театрындагы иш-чарада окуганым эсимде. Айтматов улуу жазуучу жана агасы катары көрүп, сый-урмат мамиледе болушкан", — деп эскерет академик Акматалиев.
Сүрөттөгү бул мезгилде Түгөлбай Сыдыкбеков 69, ал эми Чыңгыз Айтматов 52 жашта болгон.
