БИШКЕК, 23-апр. — Sputnik. Бишкекте алгачкы жолу британиялык режиссер Сара Бержердин Уильям Шекспирдин пьесасынын негизинде даярдалган "Макбет" драмасы коюлат. Бул тууралуу иш-чаранын Бишкектеги уюштуруучусу, драматург Султан Раев өзүнүн Facebook тармагындагы баракчасына жарыялады.
Маалыматка караганда, спекталь 1-2-3-4-май күндөрү Кыргыз улуттук драма театрында болмокчу.
"Эмгек Орто Азиянын ичинен биринчи жолу Бишкекте коюлганы турат. Бул улуттук театр өнөрүндө чоң маданий окуя. Кыргыз сахнасында чыныгы англис театрынын салты тартууланат", — деп жазылган билдирүүдө.
Мындан тышкары, Раев бул иш-чараны өткөрүүгө тиешелүү органдар тарабынан колдоо болбой жатканын айтып, каалоочулардан жардам күтөрүн кошумчалаган.
Сара Бержер — Улуу Британиянын Королдук театрында Шекспирдин чыгармаларынын негизинде бир топ спектаклдерди койгон белгилүү режиссер.
