Москвада белгисиз үч киши Кыргызстандын номери тагылган жеңил унааны жүрүп бараткан жеринен токтотуп карактап кеткен видео социалдык тармакка жүктөлдү.
Анда окуя Москванын Капотня районунда болгону айтылат.
Видеодон көрүнгөндөй, Кыргызстандын номери тагылган унаанын артынан жолтандабас кууп келип ичинен үч эркек киши түшөт. Анан экөө колуна таяк, бирөөсү тапанча кармап чуркап барып унаанын терезесин талкалай башташат. Тапанча кармаган киши унаадан эки адамды сыртка тартып чыгат, ошол замат берки экөө ичинен бир сумканы алат да кайра өздөрүнүн унаасына отуруп кетип калышкан. Ал эми Кыргызстандын номери тагылган унаадагы кишилер машинасын калтырып ары көздөй качып кеткени көрүнөт.
ИИМдин Россиядагы өкүлү Раим Салимов окуя Москванын Капотня районунда болгонун ырастады.
"Бул боюнча биздин өкүлчүлүккө эч ким эч кайрыла элек. Жергиликтүү полиция да муну териштирип жатат. Азырынча жабырлануучулар да, шектүүлөр туурасында да маалымат жок. Териштирүү иштери жүрүп жатат", — деди ИИМдин өкүлү.
Салимов окуянын чоо-жайы аныкталгандан кийин толук маалымат берүүнү убадалады.
