БИШКЕК, 3-апр. — Sputnik. Юрий Гагарин өлөр күнү аэродромго кирүүгө уруксат берген өткөрмө документин унутуп калып жарым жолдон үйүнө кайтып келген. Бул тууралуу космонавттын кошунасы, профессор, техникалык илимдин доктору Тамара Волынова РИА Новости агенттигине билдирди.
"Биз Юрий менен коңшулаш жашачубуз. Анын өмүрүнүн акыркы күнүндө жумушка чогуу чыкканбыз. Мен ишке кечигип жаткан болчумун. Апам лифттин эшигин кармап туруу үчүн сыртка чыкса, Юра лифттин ичинде күтүп турган экен. Чогуу ылдый түшүп, көчөнүн кесилишине чейин басып келгенибизде Юра "ии, мен биринчи жолу аэродромго кире турган өткөрмө документимди үйгө унутуп коюптурмун" деген бойдон артка кеткен", — деп Волынова Москвадагы журналисттер үйүндө сүйлөп жатып айтты.
Анын айтымында, Гагарин "сени бүт өлкө тааныйт, документи жок эле кете бер да" дегенге карабай артка жөнөгөн.
"Өткөрмө документи анын күрмөсүнүн чөнтөгүндө калган экен. Эртең мененки тамагын ичип жаткан балдарынын бетинен өөп чыгып кеткен", — деп Волынова кошумчалады.
Кечке жуук ал катуу ылдамдык менен бара жаткан бир нече кызматтык унааны көрүп, коңшуларынан Гагариндин жоголуп кеткенин уккан.
Ал ошондой эле космонавттын үй-бүлөсү менен азыркыга чейин коңшулаш жашай турганын кошумчалады.
Гагарин 1968-жылдын 27-мартында МиГ-15УТИ учагы менен шериги Владимир Серегин экөө машыгуу учурунда кырсыктаган. Авиакырсыктын нагыз себеби бүгүнкү күнгө чейин белгисиз. Техниканын баары оң болгону аныкталган. Учкучтардын канында алкоголдук ичимдик жок болуп чыккан.
