Биринчи кезекте Кыргызстанда кайсы кесипте иштегендер канча сом аларын билип алалы. Салыштырмалуу көп айлыкты финансы жана камсыздандыруу жаатында иштегендер алат экен. 34 667 сом. Ал эми эң төмөнкү айлык акы искусство менен көңүл ачуу жаатында иштегендердики. Маданиятты көтөрүп, элге эстетикалык ырахат тартуулагандар болгону 8 541 сом алышат.
Ким канча акча аларын билип алдык, келгиле ошол алган айлыкка канча жана кандай мал-жандык келерин эсептеп көрөлү. Мисалы жазында боло турчу жакшылыкка жылкы сатып алуу үчүн финансы тармагында иштеген адам үч айлыгын чогултушу керек. Таман чыккан жылкынын баасы 70-80 миңдин тегерегинде. Ал эми маданият тармагында иштегендер жылкы соём десе алты ай алган айлыгын ичпей-жебей сакташы зарыл. Эгерде финансы тармагындагылар маянасын кой менен алганда айына 4 койдон алып турмак. Саламаттык сактоо жана маданият тармагындагылар бир койдон алып турмак экен. Ии, баса, мал күзүндө арзан болот экен, ошону эске алып койгула.
Айлык менен койдун баасын эсептеп жатып, алдыдагы Нооруз майрамына карата Бишкек мэриясынын программасын жазганды унутуп кала сактапмын. 21-мартта "Ала-Тоо" аянтында бардык тургундардын көңүлүн көтөрө турчу майрамдык концерт болот. Кайсы концерт кайда болорун бул жактан окуңуз.
Майрам майрамы менен деңизчи, ошентсе да Бишкекти көрктөндүрүп, жакшыртып туруу ар бирибиздин милдетибиз. Борбор калаанын чок ортосу жакынкы аралыкта кандай болуп кубуларын мэрия көрсөттү. Оозуңар ачылат, көрөр алдында терең дем алып алгыла.
Валюта наркы. Сомдун баасы долларга карата орто эсеп менен 68.21 (сатып алуу) жана 68.44 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 44.50 сом, АИ-92 үлгүсүндөгүсү 41.80 сом, ал эми дизель майы 42.50 сомдон сатылууда.
Соңку сөз. Алган айлыгыбыз бир үйүр жылкы алганга жетсин деген тилек менен Расул Үсөналиев.
