БИШКЕК, 15-мар. — Sputnik. Борбор калаанын мэриясы 21-марттагы "Нооруз" майрамына карата программаны жарыялады.
Ага ылайык, муниципалитет борбордук "Ала-Тоо" аянтын шөкөттөй баштады. "Илбирс" имараттарынын аркалары кооздолуп, аянттагы фонтандар иретке келтирилет. Андан сырткары, Чүй проспектисинин Абдрахманов көчөсүнөн Жаш Гвардия бульварына чейин композициялык фигуралар коюлуп, шаардын негизги көчөлөрүнө атайын жазуулар илинмекчи.
Программа:
21-мартта саат 10:00дө Маданият, маалымат жана туризм министрлигинин имаратынын алдында кол өнөрчүлөрдүн жасаган эмгектеринин көргөзмөсү болот. Кыргызстандын аймагында жашаган элдин коомдук бирикмелери чыгармачылыгын тартуулап концерт коёт.
Саат 11:00дөн 14:00гө чейин "Ала-Тоо" аянтында майрамдык иш-чара өтүп, шаардагы чыгармачыл топтордун концерти менен коштолот. Андан сырткары, борбор калаанын райондорунун ар биринде Ноорузга карата майрамдык иш-чаралар уюштурулат.
Саат 9:00дө Дайыр Асанов атындагы паркта ("Нават" жана "Корчма" кафелеринин жанында) улуттук тамактардын майрамдык көргөзмөсү болот.
Ал эми саат 12:00дө шаар тургундары менен коноктору үчүн майрамдык концерт өтөт.
Майрам күнү, 21-мартта, аба ырайы кандай болорун синоптиктер айтты. https://sputnik.kg/Kyrgyzstan/20180315/1038170462/nooruz-aba-yrayy-sinoptik.html Ага көз салып коюңуз.
