ТЭЦтеги аварияга күнөөлүүлөр айтылып, кызматтан алуу сунушталды

БИШКЕК, 19-фев. — Sputnik. Бишкек шаарын жылуулук менен камсыздаган борбор (ЖЭБ — ТЭЦ) ишинин үзгүлтүккө учуроосун иликтеген мекемелер аралык комиссиянын чечими менен бир нече киши жумуштан алынып, дагы жети кызматкерге сөгүш жарыяланмакчы. Бул тууралуу өкмөттүн маалымат кызматы билдирди.

Эскерте кетсек, 26-январь күнү кечинде Бишкек ТЭЦиндеги эски буу казандарга суу берген куур жарылганы айтылган. Кырсыктын кесепеттери 30-январда гана жөнгө салынып, шаардыктардын үйүнө жылуулук берүү калыбына келе баштаган.

Кырсыктын себептерин аныктоо үчүн биринчи вице-премьер Аскарбек Шадиев башында турган мекемелер аралык комиссия түзүлүп, ал бүгүн, 19-февралда, кырсыкка тиешеси бар бир катар жактарга карата чара көрүүнү сунуштады.

Шадиевдин айтымында, борбордун жетектөөчү жамааты жана жабдуулар штаттан тышкаркы абалга даярдалган эмес.

"Авариянын себептеринин бири болуп Бишкек шаардык ЖЭБинин эски жабдуусун оңдоо иштеринин жетишсиз каржыланышы саналат, ал дээрлик калдык принциби боюнча жүзөгө ашырылган. Ошондуктан Бишкек шаардык ЖЭБ ишин турукташтырууда 2018-жылы оңдоо-калыбына келтирүү иштерин каржылоону жогорулатуу маанилүү кадам. 2017-жылга салыштырмалуу каржылоо көлөмү 322,2 миллион сомго жогорулатылып, 730,5 миллион сомду түзмөкчү. Буга байланыштуу Бишкек шаардык ЖЭБде 2018-жылга деталдык иш планын аткаруу зарыл", — деди Шадиев.

Мындан тышкары, Бишкек ЖЭБдин мурдагы директору Лев Васильев белгилегендей, аталган абал көбүнесе өлкөдө жылуулук жана энергия булактары үчүн тариф тутуму узак мөөнөттөн бери чечилбей келе жаткандыгына байланыштуу келип чыккан.

Комиссиянын ишинин жыйынтыгы боюнча чечим кабыл алынып, премьер-министрдин кароосуна "Электр станциялары" ишканасынын техникалык директору Алмаз Жусупбековду, гидротехникалык кызматынын башчысы Кубанычбек Манкиевди, эскплуатация жана жылуулук-техникалык жабдууну ремонттоо кызматынын башчысы Урмат Мамбетовду ээлеген кызматынан бошотуу сунушу киргизилди.

Эскерте кетсек, буга чейин ЖЭБдин директору Оморкул уулу Нурлан, анын биринчи орун басары Бердибек Боркоев жумуштан алынган.

Мындан тышкары, "Электр станциялары" ишканасынын башкы директору Узак Кыдырбаев менен ишенимдүүлүк жана коопсуздук техника кызматынын башчысы Сергей Абдулхаировго, "Улуттук энергетикалык холдинг компаниясы" ААК башкармалыгынын төрагасы Айбек Калиевге жана анын орун басары Нурлан Садыковго, Өнөр жай, энергетика жана жер казынасын пайдалануу мамлекеттик комитетинин төрагасы Уланбек Рыскуловго жана анын орун басары Азамат Оморовго, ошондой эле Экологиялык жана техникалык коопсуздук боюнча мамлекеттик инспекциянын директорунун орун басары Болот Жусуевге катуу сөгүш жарыялоо сунушталды.