Кечээ таң эрте өкмөт башчыга тиш кайрап, аны "отставкага кетиребиз" деген дем менен депутаттар жыйын баштады. Ал арада Жогорку Кеңешке Сапар Исаков өкмөт мүчөлөрү менен келип ТЭЦтеги авария боюнча отчет берип, дагы бир жолу калаа тургундарынан кечирим сурады.
Кезекке тизилген эл өкүлдөрү биринин артынан бири суроо жаадырды. Сыягы көбү катуу сууктан үшүп калса керек. Жыйында ТЭЦтин жетекчиси менен Калиев канча айлык алаары маалым болуп, дагы бир "шустрый" депутат мүмкүнчүлүктөн пайдаланып Калиевдин кайнатасы кайда иштерин билип алды.
Ал ортодо Сапар Исаков да агынан жарылып "өзү деле араң турганын, баарын "жестко" кылып салгысы келерин" эл өкүлдөрүнө айтып алды. Өкмөт башчы эми кимдерди "жестко" кылат болду экен? Айтор, жыйын кызыктуу болуп тез эле кечки саат алты болуп калды. Бул учурда Исаков Ала-Арча суусу көтөрүлүп жатканын айтып, уруксат сурап жыйындан кетти.
Саясатты сүйгөндөр кечээ ЖК жыйынын сериал көргөндөй эле көрсө керек. Көрбөй арманда калгандар бул жактан кайталап көрүп алгыла!
ТЭЦтин азабы ооруканаларга кедергисин тийгизип койгон жокпу деген максатта кабарчыларыбыз атайын репортаж жасап келди.
Саясат дей бербей спортту деле сүйлөйлү. Кыргыздын кышы деле сонун, анан эмнеге кышкы спортубуз өнүкпөйт? Себебине Кабыл Макешов ой калчап көрдү.
Валюта наркы. Сомдун баасы долларга карата орто эсеп менен 68.33 (сатып алуу) жана 68.55 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 44.90 сом, АИ-92 үлгүсүндөгүсү 42.00 сом, ал эми дизель майы 41.00 сомдон сатылууда.
Соңку сөз. Биз күткөн жаз да келээр!
Аманчылык каалап, Таалайгүл Усенбаева.
