БИШКЕК, 28-дек. — Sputnik. Геологдор менен тоо кен өнөр жайчылар ассоциациясы "Кумтөр" кенинин ишмердүүлүгүн узартуу зарылдыгы айтылган билдирүү таратты.
Анда 25 жыл ичинде кен 3 миңге чукул кыргызстандык адистерди даярдаганы айтылат. Бирок алты жылдан кийин кен жабылып, алардын баары жумушсуз калары белгиленген. Мындан тышкары, геологдор өлкө бюджети жыл сайын түшчү 9 миллиард сом тикелей салыктан куру каларын, ал эми кыйыр таасири андан кыйла чоң болоруна токтолушкан. "Кумтөр" өлкө ИДПсынын 7 пайызын түзөт.
"Мындан улам өкмөт тез арада геологиялык чалгындоо иштерин жүргүзүү үчүн жаңы аянтчаларды бериши керек. Бул үчүн мурда экс-премьер-министр Өмүрбек Бабанов тарабынан жокко чыгарылган 16 гектар жерди калыбына келтирип берүү кажет", — деп айтылат катта.
Ассоциация аталган жер аянты алынгандан кийин пландалган инвестициялар токтотулуп, кендин ишмердүүлүгү солгундаганын белгиледи.
Кайрылууда мында бардык экологиялык нормаларды так сактоо керектиги айтылат.
