БИШКЕК, 27-дек. — Sputnik. Жогорку Кеңештин депутаты Дастан Бекешев өзүнүн социалдык тармактагы баракчасына Мамэкотехинспекция менен Кыргызгидрометтин Бишкектин абасындагы зыяндуу заттар тууралуу берген маалыматын жарыялады.
Кыргызгидрометтин мониторингине караганда, акыркы айларда абада азот диоксиди, азот оксиди, күкүрт жана формальдегид нормадан ашып кеткени байкалган.
"Ал эми Мамэкотехинспекциянын маалыматы боюнча Бишкектин жолдору 40-45 миң унаага ылайыкташканы менен анда жүргөн машиналардын саны алда канча көп. Мисалы, күн сайын көчөгө 80 троллейбус, 250 автобус жана 3 миң чакан автобус чыгат. Бирок унаалардан чыккан зыяндуу газдардын деңгээлин көзөмөлдөй турган эч кандай нормативдик акт жок", — деди депутат.
Ошондой эле Бекешев жарандар кандай аба менен дем алып жактанын билип, жаратылыштын тазалыгы үчүн күрөшүшү керектигин баса белгиледи.
Күкүрт диоксиди (SO2) астма оорусу менен жабыркагандарды аллергия кылат. Организмдеги В1 витаминин жоготот.
Формальдегид аллергияны пайда кылат, мутацияга алып келчү касиетке ээ. Ошондой эле дем алуу органдарын жабыркатат.
