Бишкектеги "Асанбай" паркынын жанындагы үйдүн короосунан бир кыз жаңжал салганын күбө Sputnik Кыргызстан агенттигине билдирди.
Анын айтымында, окуя 24-декабрда эртең менен Токомбаев жана Сухэ Батор көчөлөрүнүн кесилишиндеги көп кабаттуу үйдүн короосунда болгон.
"Кыз болжол менен саат 8:30дар чамасында келген. 11:00гө чейин тынчтык берген жок. Жергиликтүү тургундарга асылып, кыйкырып-өкүрүп, ары-бери өткөндөрдү баштыгы менен чаап жатты. Күзөтчүнү да бир муштап калганга жетишти. Тургундар милиция чакырдык. Бир маалда эки киши келип кызды байлап, машинага салып алып кетти", — деди күбө.
Бир аздан окуя болгон жерге милиция келип, кызды башкалар алып кеткенин билгенден кийин кетишкен. Күбөнүн айтымында, кыз короодон өзүн өлтүрүүгө аракет жасаган.
Октябрь РИИБден билдиришкендей, кыз психикалык жактан жабыркагандардын ооруканасына алып келинген.
"Кыз наркология бөлүмүнө жеткирилген. Дарыгерлердин бригадасы чакырылып аны психикалык жактан жабыркагандардын ооруканасына алып кетишкен", — деп милициядан маалымдашты.
Учурда окуянын чоо-жайы такталып жатат.
