БИШКЕК, 16-дек. — Sputnik. Кечээ, 15-декабрда Чүй облусунун Арашан айылында WEF45 — Proffight 17 жана AFCA эл аралык турнири болуп өттү.
Жалпысынан эрежесиз уруш боюнча беттешке 22 жуп катышты.
Кыргызстандык мушкер Алманбет Абдывасы уулунун өзбекстандык атаандашы Азизбек Акбаров менен кармашы турнирдин негизги окуясы болду. Алманбет атаандашын төртүнчү раундда техникалык нокаут менен жеңип, Азиялык AFCA лигасынын чемпиону аталды
Эл аралык турнирде Кыргызстандын, Казакстандын жана Өзбекстандын спортчулары ат салышты.
AFCA — Азиялык спорттук лига.
WEF (ред. — World Ertaymash Federation) — Бүткүл дүйнөлүк кулатуу эр таймаш федерациясы. 2014-жылы дүйнөлүк деген статус алган, ММА боюнча беттештерди өткөргөн спорттук уюм.
WEF турнирлери спортчулардын деңгээлине жараша төрт серияда өтөт.
WEF "Amateur" — каалаган мушкер катыша алат, башкача айтканда эрежесиз урушка кадам таштайт;
WEF "Selection" — спортчулар деңгээлине жараша тандалып, жеңип чыккандар WEFтин кийинки "Proffight" баскычында ат салыша алат;
WEF "Proffight" — деңгээли орто мушкерлер күч сынашат;
WEF "Global" — эң мыкты спортчулар чемпиондук кур үчүн кыл чайнашат.
