БИШКЕК, 12-дек. — Sputnik. Караганда облусунда 600дөн ашык шахтер иш таштады. Бул тууралуу Sputnik Казакстан эмгек жана социалдык коргоо министри Тамара Дүйсеновага шилтеме берип жазып чыкты.
Маалыматка караганда, шахтерлор жумушка келгени менен иш кылбай отурушат. Жалпы 684 адам жумуш таштаган.
"Алардын 32си жумуш берүүчү менен сүйлөшүүлөрдү жүргүзүп жатат. Бардык сегиз шахтадан төрттөн өкүл келген", — деди Дүйсенова.
Анын айтымына караганда, шахтерлорго медициналык жардамдан тарта тамак-ашка чейин берилип жатат.
Дүйшөмбү күнү, 11-декабрда, "Арселор Миттал Темиртау" көмүр департаментинин төрт шахтасынын 200гө жакын кызматкери нөөмөт алмашуудан кийин жер үстүнө чыгуудан баш тартышкан.
Кызматкерлердин негизги талабы — маянаны 100 пайызга көтөрүү.
Мындан тышкары, шахтерлор пенсия чегин 50 жашка түшүрүү талабын коюшууда.
Ошондой эле ооругандыгы тууралуу кагаздын төлөмүн 100 пайыз төлөө, ден соолукту чыңдоочу "Шахтер" комплексин кайтарып берүү талаптары коюлганын министр белгилеген.
Учурда бул маселе боюнча атайын топ иш алып барып жатат.
