БИШКЕК, 10-дек. — Sputnik. Sputnik Кыргызстандын редакциясына окурмандар Бишкектин май куюучу жайларында бензинди бөксө куя турганы туурасындагы аңыздын чын-төгүнүн билүүнү суранып кайрылышкан. Алардын өтүнүчүн аткаруу үчүн кабарчыбыз май куюучу станцияларда мурун иштеп кеткен эки киши менен сүйлөштү. Алар бир нече май куюучу жайларда иштешкен, бирок бир ыкманы купуялуулук шарты менен айтып беришти.
"Орточо эсеп менен майдын бир литринен 50-100 граммдан кармалат. Аздай эле туюлат, бирок натыйжада кыйла эле сумма чыгып калат. Мындай көрсөтмө ишкананын жетекчилигинен келет. Системаны мындай ыкмага ченөө, түздөө жана механизмди пломбалоочу механик ишке ашырат", — деди май куюучу жайдын мурдагы кассири.
Кыргызстандын мунай сатуучулар ассоциациясы май куюучу жайлардын мурдагы жумушчуларынын бул айткандарын четке кагышты. Аткаруучу директору Улан Кулов товардын өзгөчөлүгү – анын көлөмү жаратылыштын жылуулук даражасына жараша өзгөрөрүн, ал эми ченемдик документтерде оош-кыйыштар орун аларын түшүндүрдү.
"Май куюучу жайлар боюнча бул айтылган кептер туура эмес. Аларда көзөмөлдүн так тутуму тизилет — ири ишкана ар бир баскычта өз жабдыгына көз салып, аны текшерип турат. Муну мамлекеттик органдар да көзөмөлдөйт", — деди Кулов.
Ошондой эле ал бардык ишканаларда кандайдыр суроо туулса, кардарлар жооп ала билчү "ишеним телефондору" иштерин кошумчалады.
