БИШКЕК, 4-дек. — Sputnik. Чүйдүн Жайыл районунда күйөөсүнүн өлүмүнө шектелип аялы жана анын туугандары кармалганын ИИМдин маалымат кызматы кабарлады.
Билдирмеге караганда, 24-ноябрда жергиликтүү тургун 50 жаштагы күйөөсү үч күн мурун үйүнөн чыгып кеткен бойдон дайынсыз жоголгонун айтып, райондук милиция бөлүмүнө кайрылган. Ошондой эле аны белгисиз бирөөлөр уурдап кеткени айтылган.
Аталган факты боюнча Кылмыш жаза кодексинин 123-беренеси (Адам уурдоо) менен кылмыш иши козголуп, ыкчам-издөө иштери башталган.
"Жоголгон адамдын туугандарын суракка алганда айылындагы бир кишини шектүү катары көрсөтүп, ал кармалган. Бирок тугандарынын берген көрсөтмөсү күмөн жарата баштаган. Кийинчерээк изделип жаткан киши өлтүрүлгөнү аныкталган", — деп айтылат билдирүүдө.
Ал эми мурда кармалган айыл тургуну коё берилген.
Алдын ала маалыматтар боюнча окуянын келип чыгышына жубайлардын ортосундагы пикир келишпестик себеп болгон. Үй-бүлө 10 жылдан бери бирге жашап, балдарды чоңойтушкан. Коңшулары ал киши ичимдик көп ичип, үйүндө тез-тез чуу салып турганын айтышкан.
Учурда соттук медициналык жана башка экспертизалар дайындалып тергөө иштери жүрүп жатат.
