БИШКЕК, 1-дек. — Sputnik. Премьер-министр Сапар Исаков Кытай эл республикасынын мамлекеттик кеңешинин премьери Ли Кэцян менен кызматташуунун актуалдуу маселелерин талкуулады. Бул тууралуу өкмөттүн маалымат кызматы кабарлады.
Белгилей кетсек, Исаков ШКУга мүчө мамлекеттердин өкмөт башчылар кеңешинин 16-жыйынына катышуу үчүн келген
Исаков Ли Кэцянды Кытайдын Коммунисттик партиясынын борбордук комитетинин саясий бюросунун туруктуу комитетине мүчө болуп кайра шайланышы менен куттуктады.
"Кытай Кыргызстандын ишенимдүү стратегиялык өнөктөшү болуп эсептелет. Биз эки тараптуу мамиленин өнүгүшүнө жана чыңдалышына кызыкдарбыз", — деди премьер.
Өкмөт башчысы ошондой эле Си Цзиньпиндин Жибек Жолунун Экономикалык алкагын түзүү демилгесин Кыргызстан колдой турганын баса белгиледи. Андан сырткары, бүгүнкү күнү Кыргызстан Кытай менен биргеликте транспорт, энергетика, айыл чарба жана башка тармактарда биргелешип иш алып барып жатканын айтты.
Исаков ошондой эле Кыргызстан Ысык-Көлдүн айланасын курчай курула турчу жолду каржылоого Кытай тарап жардам берет деп ишеним артып жатканын кошумчалады. Андан сырткары, өлкөлөр ортосундагы соода-экономикалык байланышты арттыруу үчүн кыргыз-кытай инвестициялык фондун түзүү зарылдыгын айтты.
Өкмөт башчы ошондой эле автожеткирүүчүлөр менен Кыргызстандын жарандарынын Кытай визасын алуу маселесине көңүл бурду.
"Жарандардын катташы эки тараптуу соода-экономикалык мамилелердин өнүгүшүнүн негизин түзөт. Андыктан Кытай тарапты Кыргызстандын жарандарына виза берүү процедурасын жеңилдетүүнү карап көрүүнү суранабыз", — деди Исаков.
Өз кезегинде Ли Кэцян Кытай менен Кыргызстан тең укуктуу өнөктөш жана жакшы кошуналардан экенин айтты.
Ал эми Кыргызстандын жарандарына Кытайдын визасын берүүнү жеңилдетүү аракеттери эки өлкөнүн Тышкы иштер министрликтеринин деңгээлинде каралышы керектигин кошумчалады.
Ли Кэцян сөзүнүн аягында Сапар Исаков айткан Ысык-Көлдү айланта салынчу жолду каржылоо жана кыргыз-кытай инвестициялык фондусун түзүү сыяктуу маселелерди Кытай тарап тыкыр карап чыгарын билдирди.
