БИШКЕК, 25-ноя. — Sputnik. Бишкек шаарынын Биринчи Май райондук соту депутат Канат Исаевди дагы эки айга камакта калтыруу чечимин чыгарды. Бул тууралуу эл өкүлүнүн жубайы Жамиля Исаева билдирди.
Ал ошондой эле сот отуруму жабык болгонун кошумчалады.
Белгилей кетсек, Исаев 30-сентябрь күнү кечке маал кармалган. Аны Башкы прокуратура массалык башаламандык уюштурууга жана бийликти күч менен басып алууга даярдык көргөн деп айып таккан.
Ал эми Улуттук коопсуздук мамлекеттик комитети (УКМК) Исаевден тышкары уюшкан кылмыштуу топтун мүчөлөрү да кармалганын билдирген. Башкы прокуратуранын тараткан маалыматы боюнча Исаев эгер президенттикке талапкердин бири шайлоодо утулуп калса массалык башаламандык уюштуруу, бийликти басып алуу боюнча айрым адамдар менен сүйлөшүп макулдашкан.
Мындан сырткары, YouTube каналында Канат Исаевге байланыштуу видео жарыяланган.
