БИШКЕК, 24-ноя. — Sputnik. Францияда дарыгерлер денесинин 95 пайызы күйүп калган адамга операция жасалыпр, териси алмаштырылды. Бул тууралуу РИА Новости France Info басылмасына таянуу менен билдиришти.
Маалыматка караганда, мындай операция дүйнөдө биринчи жолу жасалып жатат. Тери алмаштыруу Парижде Сан-Луи ооруканасында бир нече этап менен жүргүзүлгөн.
"Биз биринчи жолу теринин 95 пайызын алмаштырып жатабыз", — деди пластикалык хирург, профессор Морис Мимун.
Операция жасалган эркек 2016-жылы сентябрь айында жумуш үстүндө катуу күйгөн. Анын эгизи донор болууга дароо макулдугун берген. Алгач дарыгерлер бейтапты текшерүү максатында бир нече операция жасашып, андан соң терини алмаштырышкан.
Жалпы жонунан донор болгон адам терисинин 50 пайызын берген.
Учурда 33 жаштагы бейтап ооруканадан үйүнө чыгарылган. Өз алдынча кыймылдап, реабилитациялык курстан өтүүдө.
