Кечээ кесиптештерибиз менен мушкерлердин кыл чайнашкан беттешине күбө болуп келдим. Бирок ал нерсеге да оңойчулук менен жете алган жокпуз. Белгиленген убактысы 18.00дө барсак спорт сарайдын алды митинг болуп жаткандай ызы-чуу… Эл тим эле өзү октагонго чыга тургандай алдыга оозунуп, ооздогу күзөтчүлөрдү тебелеп өтүп кетчүдөй сүр көрсөтүштү. Ошентип турнирге кирбей жатып эле "мушташты" көрүп алдык. Ушуну көрүп эле кайра үйүбүзгө кетет окшойбуз деп турсак, бирин-серин киргизе баштады. Жаалданган элдин арасында артка-алдыга, оңго-солго, "өйдөгө-ылдыйга" түртүлүп отуруп бир жарым саат дегенде араң ичине кирдик. Уюштуруучулар ушул жагын жакшылап колго алса болмок экен.
Ал эми беттештин өзү аябайгандай бүйүр кызытты. Башкы чемпиондук курду Актилек Жумабек уулу багындырса, Мурод Хантураев курдан кур жалак калды. Ал эми Кылычбек Саркарбаев чемпиондукту колдон чыгарып жиберди. Беттештин кандай өткөнү туурасында бир аздан кийин кененирээк тааныштырабыз.
Кечээги күндүн дагы бир маанилүү жаңылыгы президент Алмазбек Атамбаев бир катар ишмерлерге мамлекеттик сыйлыктарды тапшырганы болду. Анда сөз сүйлөгөн өлкө башчы "мени отуруп алып эле балп эте берет десеңер жаңыласыңар. Мен баарын ойлонуп жасайм, өз учурунда Нурсултан Назарбаев мени кечирбей турганын билгем" деп агынан жарылды.
Андан тышкары, 30 жылдан бери өзүнө түтүп келген жубайына "Эрдик" медалын бергиси келгенин айтты.
Ал арада Forbes журналы сулуулугу менен 110 миллион долларга чейин тапкан дүйнөнүн эң кымбат моделдерин атады. Буларга да медаль тагыш керек го дейм…
Машиналар эки эсе арзандайт. Унаа базарынын жаңы доору тууралуу
Таш-Көмүр шаарынын алды сансыз байлыкка, анык табигый кенчке толо. Ашыкча байлык ташкөмүрлүктөргө далай азап тарттырганбы?
Кыштын алдында жакыр үй-бүлөлөргө, майыптарга жана пенсионерлерге берилчү мамлекеттин акысыз көмүрү баш ооруга айланды.
Бүгүн өлкө аймагында күн ачык болот.
Валюта наркы. Сомдун баасы долларга карата орто эсеп менен 69.60 (сатып алуу) жана 69.78 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 43.50 сом, АИ-92 үлгүсүндөгүсү 40.60 сом, ал эми дизель майы 38.50 сомдон сатылууда.
Соңку сөз. Күч атасын тааныбайт!
Күнүңүздүн куунак өтүшүн тилеп Эламан Карымшаков.
