БИШКЕК, 22-ноя. — Sputnik. Президент Алмазбек Атамбаев мамлекеттик сыйлыктарды тапшырып жатып, өзүнүн айрым кадамдары тууралуу айтып берди.
"Көпчүлүгү Атамбаев дагы балп этти деши мүмкүн, мен эмоцияга алдырганым менен бардыгын ойлонуп айтам. Айрым кадамдарымдан кийин күчтүү душмандарды чогултуп жатканымды түшүнгөм. АКШнын базасын чыгарып жатканда мага эч ким ишенген эмес, керек болсо америкалыктар дагы. Анткени базаны жайгаштырып жана "Ак үйгө" башкарууга мүмкүнчүлүк берүү менен биз эки улуу державаны — Россия менен Кытайды капа кылдык", — деди Атамбаев.
Ал ошондой эле АКШ бере турган жардамга куштарлангандан көрө коңшулар менен достук мамилени чыңдоо пайдалуу экенин кошумчалады.
"Кээде мамилени бузганга туура келди. Каримов мени эч качан кечирбей турганын түшүнгөндө мени кубанды деп ойлобогула. БУУнун трибунасына чыгып сүйлөөгө даярданып жатканда Назарбаев мени эч качан кечирбей турганын билген эмес деп ойлобогула. Эгер мен ал жерде жана сыйлоо аземинде унчукпай отуруп алсам, Кыргызстанды тизмеде алтынчы болгон "шестерка" башкарып калмак", — деди ал.
Сөзүнүн соңунда "кызмат орундарын бербегени үчүн" бир топ дос менен туугандарын жоготконун билдирди.
