БИШКЕК, 20-ноя. — Sputnik. Алматыда уурдалган Lexus 570 үлгүсүндөгү унаа Бишкектен табылып, артка кайтарылбай жатат. Бул тууралуу Sputnik Кыргызстан агенттигинин кабарчысына унаанын ээси Сакен Ахматов билдирди. Анын жол тандабасын 2017-жылдын февраль айында машина базарлардын бириндеги унаа токтотуучу жайдан уурдап кетишкен.
Алматынын полициясы унааны төрт ай издеп Кыргызстандын борборунан тапкан. Авто кыргызстандык айымдын атына жазылып, бирок машинаны анын УКМКда иштейт делген байкеси айдап жүрөрүн Ахматов белгиледи.
"Lexus 570 үлгүсүндөгү жол тандабасты 65 миң долларга сатып алгам. Аны үстүбүздөгү жылдын февраль айында уурдап кетишти. Видео жазылмасы дагы бар. 24-майда Карасай районунун ИИБи Кыргызстандын ИИМине кат жолдогон. 25-майда унаа Бишкекте экени аныкталган", — деди Ахматов.
ИИМдин уюшкан кылмыштуулукка каршы күрөшүү башкы башкармалыгынын кызматкерлери тарабынан издөө иштери жүргүзүлүп, кыргызстандык А.А. аттуу кыздан авто алынган. Кийин унаа ИИМдин айып короосуна токтотулган. Жол тандабасты кыздын УКМКда иштейт делген байкеси айдап жүргөн. Ахматов унааны камакка алуу учурунда автосун тааныган. Ал эми атайын экспертиза жол тандабастын VIN-коду өзгөртүлбөгөнүн көрсөткөн.
"Мен машинамды алып кетүү үчүн Бишкекке 9-июнда бардык документтерди алып келгем. Бирок ал кагаздар толук каттоодон өтпөгөнүн айтышып, унааны беришкен жок. Мен Кыргызстандын ИИМине көп жолу кайрылуу катын жөнөттүм. Бирок маңдай терим менен тапкан акчага алган унаамды бербей жатышат. Анын үстүнө А.А. аттуу кыздын байкеси УКМКда иштей турганын айтып, унаамды алалбай турганымды билдирди", — деди Алматынын тургуну.
Sputnik Кыргызстан агенттиги УКМКга ушул маселе боюнча кайрылганда, комитеттин маалымат катчысы Рахат Сулайманов аталган факты боюнча кызматтык териштирүү жүрүп жатканын билдирди.
"Жетекчилик тарабынан Өздүк коопсуздук кызматына тапшырма берилди. Эгер айыпталып жаткан кызматкердин күнөөсү аныкталса мыйзам чегинде жооп берет", — деди Сулайманов.
Башкы прокуратуранын сайтына жарыяланган маалыматка караганда, кылмыш иши Мурат жана Нурик деген адамдарга карата козголгон. Алар ишеничке кирүү менен жасалма документ аркылуу Lexus 570 үлгүсүндөгү унааны 2 миллион 771 миң сомго сатышкан. Шектүүлөр кармалып, убактылуу кармоочу жайга киргизилген.
Жогоруда көрсөтүлгөн унаа негиздүү далил болгондуктан ИИМдин айып короосуна токтотулуп, тергөө иши бүтмөйүн чыгарылбай турганы белгиленген.
