"Чачыңар бир жаздыктан агарсын" деген жаңы үйлөнгөн жубайларга айтылган батанын маанисин жалгыз бой кошуна эжени көргөн сайын көп эстечү болдум. Эженин жолдошу жол кырсыгынан төрт жыл мурун каза болуп, үч баласы менен жесир калган. Күйөөсү тирүүсүндө ага эч нерсе кылдырбай балдары менен кошо бапестеп багып, иштетпептир дагы. Кокустан келген кырсык бул үй-бүлөнүн тагдырын таптакыр башка нукка өзгөртүп, азыр үч баласын багам деп назик, үлбүрөгөн эже жашоонун ысык-суугуна эми быша баштагандай. Күнү-түнү тигүү цехинде иштейт, өзүн карабайт, арыктаганын айтпай эле коеюн. "Эч нерсеге кейибейм, иштеп кыйналганым эч нерсе эмес. Жолдошум гана жанымда болсо эмне. Адамды түгөйдөн ажыратпасын" деп кээде буулугуп ыйлап алат.
Кошуна эженикине окшогон жалгыз бой аялдардын канчалаган тагдыры бар. Андыктан ар бир аялзатына да, мырзаларга да үй-бүлөлүк каалайт элем.
Өлкөдө болсо жаңылык көп. Айрыкча саясий айдыңда. Президенттик шайлоонун расмий жыйынтыгы чыгып, Сооронбай Жээнбеков 54,22 пайыз менен алдыга озуп чыкты. Ал эми анын башкы атаандашы Өмүрбек Бабанов 33,49 пайыз менен экинчи орунга илинген.
Чыдаш керек. Өкмөт башчы Сапар Исаковдун чачын кыргыз-казак чек ара маселеси агартканы калды окшойт, иш оңунан чыкпай жатат. Ал кыргыз-казак чек арасындагы кырдаалдан улам жабыр тарткан ишкерлерге колдоо көрсөтүү маселеси каралган жыйында тоскоолдуктарга бир аз чыдап турууга чакырды.
Экономика министри Артем Новиков өкмөттүн жыйынын кыргызча сүйлөп ачып көпчүлүктү кубантты. Кыргызча үйрөнүп жатканы жакшы, эми ишти да ошондой алып кетсе болду.
Саясаттан тажагандарга. Дем алыш күндөрү Чүй облусунун Озерное айылында жол тандабастардын жарышы болду. Саясаттан бир аз болсо да мээңизди сергитип, ылайга жуурулушуп чер жазгандардын сүрөттөрүнө көз чаптырып, суктанып алыңыз.
Жол тандабас демекчи, Акыйкатчы Кубат Оторбаев миллион сомдук кызматтык жол тандабастан баш тартып, финансы министри Адылбек Касымалиевге кат жолдогон. Катын бул жактан окуп коюңуздар.
Өткөн жума социалдык тармактар да жаңылыктарга бай болуптур. Ал эми кечээ ал жакта арстандын баласы катуу талкууга алынды.
Валюта наркы. Сомдун баасы долларга карата орто эсеп менен 68.66(сатып алуу) жана 68.89 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 41.90 сом, АИ-92 үлгүсүндөгүсү 39.40 сом, ал эми дизель майы 37.50 сомдон сатылууда.
Соңку сөз. Жакшы күндөр көп болсун!
Аманчылык каалап, Таалайгүл Усенбаева.
