БИШКЕК, 21-окт. — Sputnik. Бүгүн таңда Памирден алып келинген кыргыз келин Жанбүбү Маматзайым кызы уул төрөдү. Бул тууралуу өкмөттүн маалымат кызматынан кабарлашты.
Билдирүүгө ылайык, ал Бишкектеги Эне жана баланы коргоо борборунун алдындагы төрөт үйүндө көз жарган. Вице-премьер Чолпон Султанбекова ымыркайдын жана эненин ден соолугу менен таанышып келген.
"Ымыркай эртең менен саат 6.25де төрөлгөн. Бою 47 сантиметр, салмагы 2485 грамм. Эне жана баланын саламаттыгы туруктуу деп бааланууда. Ымыркай жандандыруу бөлүмүндө дарыгерлердин көзөмөлүндө", — деп айтылат билдирүүдө.
Султанбекова Эне жана баланы коргоо борборунун директору Камчыбек Узакбаевге ымыркайды өз көзөмөлүнө алууну тапшырды.
Белгилей кетсек, 13-октябрда Улуу жана Кичи Памирден 33 адам Нарынга алып келинген. Алардын 16сы өспүрүм, экөө жеткинчек калгандары ата-энелер.
