БИШКЕК, 21-окт. — Sputnik. Ысык-Көл облусунун Ак-Суу районунда ири көлөмдөгү баңгизат менен 31 жаштагы жаран кармалды. Бул тууралуу Ысык-Көл ОИИБдин маалымат кызматы кабарлады.
Ага ылайык, Ак-Суу райондук милициясынын баңгизаттарды мыйзамсыз жүгүртүүгө каршы күрөшүү бөлүмүнүн кызматкерлери тарабынан Отрадное айылынын 31-жаштагы тургундун үйү ыкчам келип түшкөн маалыматтын негизинде текшерилген.
"Тинтүү учурунда анын үйүнөн эки желим идиштен өзгөчө жыты бар өсүмдүк табылган. Химиялык экспертизанын жыйынтыгында ал марихуана болуп чыгып, салмагы 1 килограмм 350 граммды түздү. Аталган факт боюнча кылмыш иши козголду. Кармалган адам буга чейин да кылмыш жаза кодексинин 367-беренеси (Аскердик мүлктү атайын жок кылуу же зыяндоо) боюнча соттолуп чыккан", —деп жазылат маалыматта.
Учурда тергөө амалдары жүрүп жатат.
