БИШКЕК, 17-окт. — Sputnik. Бүгүн түнү Аламүдүн районунун Маевка айылында 10го чукул өрт кырсыгы катталды. Бул туурасында жергиликтүү жашоочулардын бири Sputnik Кыргызстан агенттигине кабарлады.
Билдирмеге караганда, окуя 16-октябрдан 17-октябрга караган түнү саат 21.00-03.00дөр аралыгында болгон. Жергиликтүү тургундун айтымында, түндө аны коңшусу ойготуп сыртта машинасы күйүп жатканын айткан. Ага удаа эле жанында дагы бир унаадан өрт чыккан. Анын жалыны сарай тарапка жабышканда өрт өчүрүү кызматы келип чектеген.
"Биз ызы-чууга түшкөндө 5-6 үй ары жакта жашаган кошунабыз да келип белгисиз адамдар турак жайына өрт койгонун айтты. Анын сыртта жайылып турган кийимдерин чогултушуп ошол аркылуу турак жайын өрттөгө аракет кылышкан экен. Бактыга жараша убагында өчүрүүгө жетишип калышты. Ал кошунам көчөгө чуркап чыкканда узун бойлуу кара кепкачан чоочун киши "Ак-Босого" жаңы конушу тарапка басып кеткенин көргөн", — деди тургун.
Ошондой эле ал өрттү өчүрүп бүткөндөн кийин анын кошунасы үйүнүн жанынан Subaru үлгүсүндөгү унаадан белгисиз кишилерди көргөнүн, бирок милиция келгенде алар качып кетишкенин кошумчалады. Мындан сырткары, Маевка айылынын Больничный көчөсүндөгү павильонду дагы өрттөп кетишкенин белгилешти.
Ал эми ӨКМдин маалымат кызматы өткөн суткада Маевка айылында бир турак жайдан, Fiat жана Toyota Caldina унаасынан өрт чыкканын билдирди.
Маалыматка ылайык, турак жайдын үч эшиги, эки терезеси жалпы жонунан 35 чарчы метр аянт күйүп кеткен. Ал эми Fiat толугу менен, Toyota Caldina унаасынын айрым бөлүгү күйгөн.
