БИШКЕК, 11-окт. — Sputnik. Бишкекте жолдун каршы тилкесине чыккан жеңил автоунаа автобус менен кагышкан. Бул тууралуу ШИИБдин Кайгуул милиция башкармалыгынан билдирди.
Жол кырсыгы Чүй проспектиси менен Исанов көчөлөрүнүн кесилишинде болгон. Honda CR-V автоунаасын айдап бараткан 17 жаштагы баланын жанында эч кандай документи жок экени аныкталды. Машинанын ичинде анын апасы болгон. Унаа каршы тилкеге чыгып №38 автобус менен кагышкан.
"Баланын айтымында, ал оор абалдагы 61 жаштагы тууганын Воронцовка айылынан өзүнүн үйүнө алып келе жаткан. Бейтап жолдо келе жатып каза болгон, айдоочу коркуп кетип үйгө эрте жетүү үчүн каршы тилкеге чыгып кеткен да учурда автобус менен кагышкан", — деп айтылат билдирүүдө.
Автобустагы төрт жүргүнчү жана эки айдоочу жеңил жаракат алган. Honda CR-V автоунаасын айдоочусу спирт ичимдигин ичип-ичпегени текшерилүүдө.
