БИШКЕК, 4-окт. — Sputnik. Бүгүнкү күндө кар жана жер көчкү коркунучу күч аймактарда жашаган 4409 үй-бүлөнү көчүрүү зарыл. Бул муктаждык үчүн инфраструктураны эсепке албаганда 353 гектар жер аянты керек. Мындай билдирүүнү өзгөчө кырдаалдар министри Кубатбек Боронов өкмөттүн селектордук жыйынында жасады.
Премьер-министр Сапар Исаков Чоң-Алай менен Өзгөн райондорундагы адам өмүрүн алган табигый кырсыктарын эске салып, кооптуу аймакта жашаган тургундарды көчүрүү маселесинин курч турганын белгилеп өттү.
Министр Бороновдун айтымында, жыл башынан берки 8 айда өлкө аймагындагы 1774 кооптуу аймак иликтенген.
"Быйыл 1587 үй-бүлө көчүрүлүп, 10 000ге чукул кишинин өмүрүн сактап калдык. Кар жана жер көчкү коркунучу күч аймактарда учурда 4409 үй-бүлө жашап келет. Буга инфраструктураны эсепке албаганда 353 гектар жер керек. Биринчи кезекте жер көчкү жүрүшү ыктымалдыгы күч деген аймактардан элди көчүрүү керек", — деди Боронов.
Жыйын жыйынтыгы менен өкмөт башчы жергиликтүү бийликтин аталган жаатта жүргүзүп жаткан ишин сынга алып, өкмөттүн облустагы өкүлдөрүнө калкты жайгаштыруу үчүн жерди трансфармациялоо иштерин тездетүү боюнча сунуш киргизүүнү тапшырды. Муну менен катар премьер-министр жүктөлгөн тапшырманы убагында аткарбагандар кызматынан алынарын кошумчалады.
