Депутаттын кармалышы менен Атамбаев коопсуздук кеңешинин жыйынын өткөрдү

БИШКЕК, 2-окт. — Sputnik. Алмазбек Атамбаевдин жетекчилигинде Коопсуздук кеңеши өтүп, анда президенттик шайлоого талапкерлердин үгүт иштерине байланышкан абал, президенттик шайлоого даярдык каралды.

Андан сырткары, ЖКнын депутатынын бийликти күч менен басып алууга аракет кылуу, башаламандыкты уюштурууга шектелип кармалышынын алкагында улуттук коопсуздукту сактоого басым жасоо маселеси талкууланды.

Президент укук коргоо органдары шайлоо алдындагы үгүт иштерин жүргүзүү мезгилинде жана президенттик шайлоо өткөн күнү коомдук тартипти жана коопсуздукту камсыз кылуу үчүн зарыл болгон бардык чараларды көрүүгө тийиш деп баса белгилеген. Мамлекет башчысы өкмөткө президенттик шайлоодо жарандар туруктуулуктун жана коопсуздуктун шарттарында өз эрки менен эркин добуш берүүгө укуктарын ишке ашыруу үчүн бардык шарттарды камсыз кылуу боюнча комплекстүү чараларды ишке ашырууну күчөтүү милдетин тапшырган.

Ал алдыдагы президенттик шайлоолордун шарттарында өлкөдө тынчтык жана ынтымак биз үчүн өзгөчө мааниге ээ экендигин айткан.

"Өлкөбүз үчүн абдан маанилүү мезгилде чагымчылдыкка жол бербей, тынчтыкты жана жарандардын коопсуздугун камсыз кылууга милдеттүүбүз. Эгерде башаламандык уюштуруу аракеттери аныкталса, мыйзам боюнча сөзсүз түрдө катуу жазага тартылышын кепилдик кылуу керек. Мамлекеттин кызыкчылыгы жана анын келечеги үчүн шайлоо алдында өлкөдө кырдаалды курчутуу аракети катуу токтотулат", — деди Атамбаев.

Коопсуздук кеңеши тууралуу мыйзамдын 5-беренесине ылайык, ыкчам чечим же кечиктирилгис башка чечимдерди кабыл алууну талап кылган улуттук коопсуздук маселелерин талкуулоо үчүн төмөнкү кызмат өкүлдөрүнүн катышуусунда тар курамда жыйын же ыкчам кеңешме өткөрө алат.