БИШКЕК, 30-сен. — Sputnik. "Акыйкат шайоо үчүн" деген аталыштагы акция Бишкектеги Ботаникалык бакта өтүп жаткандыгын иш-чаранын демилгечиси депутат Жанар Акаевдин жардамчысы Артурбек Атакул уулу билдирди.
Эл алдына чыгып сөз сүйлөгөн депутат Жанар Акаев шайлоочуларды өз добушун сатпоого чакырды.
"Бүгүнкү иш-чаранын максаты — таза жана акыйкат шайлоого үгүттөө. Анткени бардык маселе боюнча элдин ою маанилүү. Мисалы Кыргызстандын байлыгы болгон Жогорку Нарын ГЭСин чехиялык Liglass компаниясынан алып калдык. Дал ошондой каршы туруу менен эле арзыбаган акчага сатылганы жаткан MegaCom компаниясын сактап калышыбыз керек. Бардыгын 15-октябрь күнү боло турган шайлоо чечет. Бийликтин таңуулап жаткан талапкерин шайлабай, өзүбүз каалаган тандоону кылсак, мындан ары жогору жактагылар административдик ресурсту пайдалануудан коркуп калат", — деди депутат.
Митингге келгендердин саны 100дөн ашып, алар колдоруна "Акыйкат шайлоо", "Административдик ресурска жол жок", "Бизди коркута албайсыңар", "Милиция эл менен" деген чакырыктар жазылган плакаттарды кармап турат.
