Кечээ күнү кыздардын каш-кирпигин сындай коём деп ажалдан эрте кетип кала жаздадым. Ал колумнистика чыгары менен Facebook тармагында үстүмдөн ылдый суу куюп жатып калышты. Сулуулардын каарына калып чын эле үйлөнбөй калымбы деп түнү уктай албай бир убакка чейин ойлонуп жаттым. Капа болбогула кыздар, баары бир сиздерди сүйөм.
Эми каш-кирпикти жайына коёлу да маанилүү жаңылыктарды барактайлы. Ашхабадда өткөн жабык имараттагы жана жоокер өнөрү боюнча Азия оюндарында күч сынашкан спортчулар мекенине кайтып келди. Аларды аэропорттон өкмөт башчы Сапар Исаков төш тийгизе кучактап, кыздарды беттен өөп тосуп алды.
Кечээ кыргыз живописинин атасы Гапар Айтиев 105ге, кыргыз-казак элинин сыймыгы Мухтар Ауэзов 120га чыкмак. Улуу инсандар тууралуу кызыктуу фактыларды сунуштайбыз.
Алданганда айласы кетип "караларга" кайрылган ишкер Азамат "Советниктин" баяны. Сокулукта жыгач цехин иштеткен майыптар кантип жан багат? Бул жактан таанышыңыз
Медицинада кездешкен оорулар түрдүү касиетке ээ. Бири көз чекчейтет, бел бейчектет, дагы бири жан кашайтат, кан кайнатат, айтор, дарт дегендин дабасы табылмайынча кыйнаганы кыйнаган. Кыскасын айтканда "Ары турчу!" деп ыңгайсыз абалга кептеген оорулар тууралуу маалымат.
Бүгүн көпчүлүк аймактарда жаан жаайт.
Валюта наркы. Сомдун баасы долларга карата орто эсеп менен 68.53 (сатып алуу) жана 68.79 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 41.50 сом, АИ-92 үлгүсүндөгүсү 39.00 сом, ал эми дизель майы 37.00 сомдон сатылууда.
Соңку сөз. Алдыдагы эс алуу күнүңүздөр романтикалуу өтсүн!
Жамгырдан, сууктан сак, оору-сыркоодон алыс болушуңузду тилеп Эламан Карымшаков.
